കേരള സംസ്ഥാന എക്സൈസ് വകുപ്പ്, വിമുക്തി മിഷൻ, ആസ്റ്റർ മിംസ് ആശുപത്രി, കോട്ടക്കൽ, ആസ്റ്റർ വോളണ്ടിയേഴ്സ് എന്നിവയുടെ സംയുക്താഭിമുഖ്യത്തിൽ അന്താരാഷ്ട്ര ലഹരി വിരുദ്ധ ദിനാചരണത്തിന്റെ ഭാഗമായി ജില്ലാതല ലഹരി വിരുദ്ധ ബോധവത്കരണ പരിപാടികളുടെ ഉദ്ഘാടനം ആസ്റ്റർ മിംസ് ആശുപത്രി, കോട്ടക്കലിൽ സംഘടിപ്പിച്ചു.
പരിപാടി ബഹു. വ്യവസായ & ഐ.ടി വകുപ്പ് മന്ത്രി ശ്രീ. പി.കെ. കുഞ്ഞാലിക്കുട്ടി ഉദ്ഘാടനം ചെയ്തു. ലഹരി മുക്ത സമൂഹം സൃഷ്ടിക്കുന്നതിന് സമൂഹത്തിന്റെ എല്ലാ തലങ്ങളിലും ബോധവത്കരണവും കൂട്ടായ പ്രവർത്തനവും അനിവാര്യമാണെന്ന് അദ്ദേഹം ചടങ്ങിൽ പറഞ്ഞു.
ചടങ്ങിൽ എക്സൈസ് കമ്മീഷണർ ശ്രീ. ജിജു ജോസ്, ജില്ലാ പഞ്ചായത്ത് വൈസ് പ്രസിഡണ്ട് അഡ്വ. എ.പി. സ്മിജി, വിമുക്തി റിസോഴ്സ് പേഴ്സൺ ശ്രീ. കെ. ഗണേഷൻ, വിമുക്തി മാനേജർ ശ്രീ. പ്രദീപ് റാവു, KSESA ജില്ലാ പ്രസിഡണ്ട് ശ്രീ. റെജി തോമസ്, ആസ്റ്റർ വോളണ്ടിയേഴ്സ് പ്രതിനിധി ശ്രീ. റാഷിഖ് സി. എന്നിവർ പങ്കെടുത്തു.
സമൂഹത്തിൽ ലഹരിയുടെ ദൂഷ്യഫലങ്ങളെക്കുറിച്ചുള്ള അവബോധം വർധിപ്പിക്കുകയും, യുവജനങ്ങളെ ലഹരിയിൽ നിന്ന് അകറ്റി ആരോഗ്യകരമായ ജീവിതശൈലിയിലേക്ക് നയിക്കുകയും ചെയ്യുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.
സാമൂഹിക പ്രതിബദ്ധതയുടെ ഭാഗമായി പൊതുജനാരോഗ്യവും സമൂഹക്ഷേമവും മുൻനിർത്തിയുള്ള ബോധവത്കരണ പ്രവർത്തനങ്ങളിൽ ആസ്റ്റർ മിംസ് ആശുപത്രി, കോട്ടക്കലും ആസ്റ്റർ വോളണ്ടിയേഴ്സും തുടർന്നും സജീവമായി പങ്കാളികളാകുമെന്ന് ആശുപത്രി അധികൃതർ അറിയിച്ചു.
